عندما تنطفىء من حولى كل الأنوار
وأضل الطريق لا أرى سوى ضوء احترامك، وطيف إيمانى بك ِ
وهما يرشدانى من أين يبدأ الطريق الصحيح .

إمضاء : تائهٌ فى دروب الحياة بدونك

مش مهم تقول : أنا أخدت ايه من مصر ، المهم تكون اضربت أد إيه فى مصر

جحــــــــــــــا..

شعور سخيف

إنك تحس بإن وطنك شىء ضعيف

صوتك ضعيف

رأيك ضعيف

إنك تبيع قلبك وجسمك

وإنك تبيع قلمك واسمك

ما يجيبوش حق الرغيف

سألوا جحا عن سر ضحكه

قالك: أصل اتنين

وشبكوا

اللى كان من تحت ميت

واللى كان من فوق كفيف

دا شعور ...

سخيييييييف

وشعور سخيف

إنك تكون رمز الشحاتة

تبنى مبنى للشحاتة

تعمل وزارة للشحاتة

يا ساقية دورى عدى فوقى ودوسى

نصبوا عليا وشحتونى فلوسى

ربطونى فيكى

حتى ما اتغميت

هما اللى فرحوا وحدى أنا

اتغميت

أنا اللى صحب البيت

عايش بدون لازمة

ولما مرة شكيت

ادونى بالجزمة

مش لاقى تطفح أديك

هاتولنا وجيبولنا وجيبونا وادونا

هنجيب منين نديك

مش لاقى تطفح أديك

طافح يا بلدى غدايا ولوعتى غدايا

وأدى الأحبة التقوا واتجمعوا عدايا

أنا اللى زارعك دهب

بتأكلينى سباخ

من كان دا تقل ودلع

بزيادة دلعك باخ

لا شوفت فيكى هنا

ولا شوفت فيكى ترف

كل اللى فيكى قرف

كرامتنا متهانة

واللقمة بإهانة

بتخلفينا ليه؟!

لما انتى كارهانا

يعنى ايه تبقى هبة النيل يا بوبة

وكل يوم المية تقطع ؟!

يعنى ايه لما اشتكى غلو الفاتورة؟!

يقولوا تشكى ...

بس تدفع

لما قش الرز ثروة بتتحرق

واما نفط الأمة ..

ثروة بتتسرق

واما جلادك على ولادك بيبطش

واما علمك مايلاقيش ياكل ...

فيطفش

يعنى ايه نرفع إدينا بالسلام لجل الغزاة ؟!

ويعنى ايه لما ابقى ماشى فى حالى

أتشد اشتباه؟!

يعنى ايه اما اتحبس أربع سنين حبس احتياطى ؟!

حبس اعتباطى !

يعنى ايه مش حاسة بالعمر وغلاوته؟!

بتصبى مُرّ العمر ليه

دا انا كنت هوهبلك حلاوته ؟!

أنا عمرى ما اتأمرت

ولا حطيت شروطى

ومكان ما ترسى مركبك

ببنى شطوطى

أنا كنت جيشك ...

لما مماليكك باعوكى

وكنت يوسف لما عشتى سنين عجاف

وضلوعى دى اللى فى معركة قادش حموكى

وشفايفى دى اللى ما بطلتش فى يوم هتاف

أنا كل شبر فى أرضك اتمرمغت فيه

وكل يوم عشتيه

أنا اتعذبت بيه

بتكرهينى عيونك السودة وأيامى اللى فاتت

ما انتيش حبيبتى من النهاردة

حبيبتى ماتت

مع صوتك أذانك جرس فى الشدة صحينلك

من امتى كان الحرس هما اللى باقينلك

بعتينى علشانهم

وعنيكى معصوبة

يا هل ترى خاينة ؟

ولا زى مغصوبة ؟

كل الكلام اتقال

والشعر بقى ماسخ

والصبر علو جبال

والظلم شىء ...

رااسخ

وطن...

وغرقان فى النطاعة

كله شىء ريحته نطاعه

علمونا بالعصاية

ورضعونا الخوف رضاعة

علمونا فى المدارس

يعنى ايه كلمة قيام

قيام ..

علمونا نخاف من الناظر

فيتمنع الكلام

علمونا ازاى نخاف

وازاى نكش

بس نسيوا يعلمونا الاحترام

فمتزعلوش لما ابقى مش بسمع كلامكم

ومتزعلوش ...

مستنى ايه من طفل ربوه بالزعاق

غير المشاكل والخناق

كل اللى بيقولك بحبك ..

دول نفاق

أنا لما قلتلك بحبك ...

كان نفاق

الحب يعنى اتنين بيدوا

مش ايد بتبنى

وستميت تيت تيت

يهدوا ..

الحب حالة

الحب مش شعر وقوالة

الحب يعنى براح قى قلب العاشقين للمعشوقين

يعنى الغلابة يناموا فى الليل

دافينين

الحب يعنى جواب لكل المسجونين

هما ليه بقوا مسجونين ؟!

يعنى أعيش..

علشان هدف

علشان رسالة

يعنى أحس بقيمتى فيكى

إنى مش عايش عوالة

يعنى لما أعرق ...

تكافئينى بعدالة

الحب حالة

يعنى مش شعر وقوالة

الحب حاجة ماتتوجدش فى وسط ناس

بتجيب غداها من صناديق الزبالة

الحب جواكى ....

استحالة .

ما تنساش ترد الباب وراك وانت ماشى من المدونة